لموضع مقورن

لموضع مقورن
0:00 / 0:00

لموضع مقورن

(قصة تخيلية)

لا لا لاي لا لا لا لا لا لا لاي دا لايل

أ كن د نكس ئ ووزون أ توݣا تابراييمت

نشا تنت غار ف واتاي ن شيبا د ليقامت

أمين أغ د ئسيميم ئمي س ؤمارݣ ئميمن

أ هايي لكمغ د غيلي غا كرس يغاراسن

ماني راد ياوي ميدن هاياغ نضفر لاطر

نݣا زوند أمكسا ماد كسيغ لهموم ئنو

ؤسين أك تيفردي شان ؤرون ئس د ميارن

ؤر ئلي كرا لعزيب أ يي ݣيسن سهناون

ؤكان نضفر تن غ ئزاغارن واحدا يانغ

ماني راد ياوي ميدن تيلاس أيد ئطارن

ها تيووتش ؤر نسوݣي تاوالا يزامارن

ؤر ئلي كرا ما د ئروحن س لموضع مقورن

أ غيد نزري يا ييض ئفو د لحال بالاكغ

لكمغ ن ياواݣور ئݣا زود ئغ د ئساول

” تاساروت دا س نطرژوم ئموت ؤمزيل نس”

أغار ندحي ت ئن ئضي تيميضي يهاقاين

ندر غ ؤغݣمي تيزي ݣوتن تيغزي لانت

ما ݣيس نژرا د ئماسن لي ف أك ؤر عاقيلخ

ياوي يي وضار ئنو زو غ ئسن تادوارييت

ئݣلدان حاقان أݣنس أد أغا تݣاوارن

توجوت ؤر يي توجي غ ؤزمز أد نسهو فلخ ت

نمودو س واياض أليغ ندر د مدن ئموتن

أر نساقرا غ ئغربان أراتن د ليشارت

تيرا د ئكلان نكي نيخ ئسا يي سبراكن

أيوز نك أ والي مي تنمالا يغانيمن

ئميك ئنضر واييس ؤتن س لجام د لحافر

نازل د أد ناݣ ؤر ئلي مندو تامديلاست

ماني راد ياوي ميدن لادان ئزري لاحت

ما غيد ئجران ئفاغ ؤمزداغ ئصبر تونت

ئغ ئݣا يميغ ئميغ أر ئفال أݣما لاطر

أ داغ ؤر تينيم ئكا ت (ؤمنصاݣ)س لحركت

ؤلا لاژ يان ئشا لاژ ؤرا يامژ ئفاسن

أ ها تيمكيلين أ غار ئد مو يباشيلن

نسرغ لفنار نرا أ سول نسيݣيل غ لقيست

أها تيݣمامين أ كا سرسنت نزري لوقت

ئلا غيد واكال ؤر نسن ما مي يݣا وينس

وماش أيت ؤخام ؤرا تينين أبلا وينخ

ئلا غيد واوال ؤسين أماݣن د لوصييت

ئلا غيد واوال ئتوݣر تيطولبا فركن

أليغ نغرا ياواوال ؤكان ئژمو يانغ

” لان ئباينوتن غيد ئضر د ؤمندل ئملك ت

تامازيرت  أد أمي تينين لموضع مقورن

تيميتار ݣر سين ئسافن غ ئلا لبنيا نس

مقار ئژرا يان لخير أ ن ؤر ئشض ئروح ت

ؤر ؤجين يان ئنان أ يزداغ أيݣ ؤ لاصل

أمر يايݣان أژيضار كشمن ئ لباس نس

وماش أد نيت ئسن ماني س ئدا وضار نس

ئغ ئژون وايور أر ئغ ئطاف ؤدم ئفاون

ياسي د لكتوب ن باباس ئغا قازن ئکالن

وماش أيݣ ئويس ن غيد نغ ئݣا غ واياون”

نفاغ نݣد لجن ؤر ئݣي ما دا تݣاوارغ

مقار نغرا يان ئميك لحرب ئغلا يانغ

ئغ لكمغ دار ئخربان سخوف ئيݣويا نس

نرور أشكو زود ئخربان أد أغ د مقورغ

لكمغ ن تيمزݣيد أها د لحيزب ن سلكت

أ ن ؤكان سرس كشمغ ؤر ئلي يات بالاكغ

ماني راد ياوي ميدن غييض أيد ئلاسن

نرور نسفلد ئ والون ئضر غ  ئهناقارن

ئغ لكمغ دار ؤساراݣ ئبي داغ ييليح ت

ئكا غيد كيݣان ئ درس ئكا ت ئ لهاوا نس

نكا تيسواك ن دونيت أر نتازلا س ئخف

نكين أيد ئسيݣيلن توفاوين بناقص

لكمغ ن دار ئݣودار نغال أ يدينارن

ئس ئلا كرا لامان ؤر ئلي ضرن د ألوفن

أليغ نكشم د ئسمضال أر نتاضر ئكالن

غاساد ئكما ت ئد لحال أر نقاز تامورت

أ تن ساقساخ ئسا سول نفاغ أيهايا نو

نفاغ ن غ ئݣر غيلي غا كرس ئيغاراسن

ؤر أك نژري غ ؤزال ئماريين د والالن

أليغ نسفلد ئ واسيف نݣين ئݣلي يانغ

تيميتار ݣر سين ئسافن غ ئلا لبنيا نس

نديو أشكو روح ئفاغ ئفل تانݣا توحل

نافي د ئخف ئنو غيلي غ نلول ؤر د رحيلغ

ئݣا صاحت ئس ندر نيلي غ لموضع مقورن

بلحاق ؤر كولو داغ ئݣي ما فا تهوالغ

غيد أغ نزري تامارا نك د لوالدين ئنو

ؤر ئلي كرا ماس ئرا تنضرم أ يبراين

وماشان هاد لبنيا لجديد ئس د أتوين

ئݣال ؤقديم ئغ أك ؤر ئصلح أر أسوسن

ها ميدن غ تامانو فركن د أك ئ يݣماين

تانا د ئكتي يان ئتو تنت ئزايد ئشوور

دا تيلينت ئلين ئسافارن سول داوانت

ئغ نوارݣ أضان أغا ساوال ئزاليون

يان ئنان ݣان أغ ئفاسر تاوارݣيت ئنو

 

اسماعيل أبلق